Còdan Obrachaidh

Aithris Riaghlaidh

Raon-ùghdarrais na Seirbheis

Chaidh an t-Seirbheis a stèidheachadh fo ullachadh Achd Conaltraidh 2003, Earrannan 208-210, gus dèanamh cinnteach gum bi sreath fharsaing agus mheasgaichte de dheagh phrògraman Gàidhlig air an lìbhrigeadh tro chraoladh no eile gu sluagh na h-Alba.
Tha ùghdarras air a thoirt don t-Seirbheis airson prògraman a dhèanamh agus ceadan craolaidh a chumail a bharrachd air an fheadhainn shònraichte air an liostadh ann an Earrann 208 (4B) de Achd Craolaidh 2003. Tha i air cumhachdan agus dleastanasan maoineachaidh a ghabhail a-staigh a thaobh maoineachadh phrògraman Gàidhlig, trèanadh, rannsachadh agus obair dhàimheach fo Earrannan 183 agus 184 de Achd Craolaidh 1990, Earrannan 32 agus 95 de Achd Craolaidh 1996 agus Pàipearan-taice co-cheangailte riutha.

Structair a' Bhùird

Tha am Bòrd air a dhèanamh suas de Chathraiche agus suas ri 11 ball eile (10 ann an 2004/05). Tha buill air an cur an dreuchd airson ùine-shuidhichte le Oifis a' Chonaltraidh (OFCOM) le aonta bho Rùnaire Stàite na h-Alba. Tha an Stiùiriche air a thaghadh leis a' Bhòrd Seirbheis.

Tha an t-Seirbheis a' strì ri bhith a' coileanadh èifeachdas leantainneach a-staigh anns gach roinn obrachaidh aca gus an coilean iad ìre cunntachalachd nas àirde, mar sin tha am Bòrd air trì Comataidhean a stèidheachadh gus buaidh agus èifeachdas a dhaingneachadh.

Comataidh Sgrùdaidh agus Barrantais

Bidh a' Chomataidh Sgrùdaidh agus Barrantais a' coinneachadh co-dhiù dà uair sa bhliadhna. Tha an raon-ùghdarrais aice a' gabhail a-staigh:

Breithneachadh air in-smachd, poileasaidhean cunntasachd agus sgrùdadh bhon taobh a-muigh
Dearbhadh gu bheil poileasaidhean, dòighean-obrach agus siostaman freagarrach, a rèir riatanasan reachdail agus builichte gu h-iomchaidh
Measadh air cunnartan agus èifeachdas na Seirbheis fhèin
Barrantachadh neach-comhairleachaidh ionmhais neo-eisimeileach airson in-sgrùdadh co-dhiù uair sa bhliadhna
Cunntas mu thoraidhean chun a' Bhùird

Comataidh Ro-innleachd agus Poileasaidh

Tha raon-ùghdarrais na Comataidh Ro-innleachd agus Poileasaidh a' gabhail a-staigh:

Suidheachadh agus prìomhachadh ro-innleachdan a bheir cothrom don t-Seirbheis a h-amasan geàrr-ùine agus fad-ùine a choileanadh
Dèanamh cinnteach gum bi poileasaidhean freagarrach air an ullachadh agus gum bi siostaman feumail an sàs airson an cur an gnìomh
Dèanamh cinnteach gum bi cuairt dealbhaidh fhreagarrach an sàs gus cuideachadh le iomairtean ro-innleachdail
Sgrùdadh air èifeachdas modhan-obrach ro-innleachdail
Ath-sgrùdadh a' Phlana Chorporra Bhliadhnail ro aontachadh a' Bhùird

Comataidh Leasachaidh

Tha raon-ùghdarrais na Comataidh Leasachaidh a' gabhail a-staigh:

Measadh agus moladh taghadh de thagraidhean a fhuaireadh airson maoineachadh
Sgrùdadh agus measadh air prògraman agus pròiseactan thar speactram nam meadhanan
Measadh agus comhairle air ceanglaichean agus beachdan luchd-cleachdaidh/-ceannaich/-dèiligidh
Measadh air sgrùdadh amharcachd agus fios air ais
Comhairle mu chom-pàirteachadh ann am pròiseactan nach buin do chraoladh
Measadh agus moladh shlatan-tomhais airson luachadh agus taghadh phròiseactan

Cunntachalachd agus In-smachd

Tha am Bòrd ag obrachadh siostam in-smachd gus am bi cunnartan air an lùghdachadh airson dìon a chur air cùisean na Seirbheis. Tha an t-uallach iomlan air na buill airson dèanamh cinnteach gun cum am Bòrd suas siostam in-smachd a bheir dhaibh barrantas reusanta gu bheil am fiosrachadh ionmhais a bhios air a chleachdadh a-staigh agus air fhoillseachadh a-muigh fìor, còmhla ri dìon maoin na Seirbheis bho ghnàthachadh no suidheachadh neo-ùgdaraichte.

Ged nach urrainn do shiostaman in-smachd sam bith làn bharrantas a thoirt an aghaidh mì-aithris, call no mì-riaghladh maoin na Seirbheis, tha na siostaman an sàs dealbhte airson comharrachadh do na buill cùisean a tha ag iarraidh aire ann an tìde gus an tèid beachdachadh orra agus dèiligeadh riutha gu h-iomchaidh.

Structair Eagrachaidh

Tha structair eagrachaidh na Seirbheis dealbhte airson gun tèid planadh, conaltradh, buileachadh, riaghladh agus sgrùdadh soilleir a dhèanamh air poileasaidhean agus amasan a' Bhùird. Tha am Bòrd gu mòr airson luchd-obrach le teisteanas iomchaidh fhastadh aig ìrean iomchaidh gus dèanamh cinnteach gum bi obair na Seirbheis air a stiùireadh gu h-èifeachdach.

Fhuair an t-Seirbheis inbhe Creideas nar Cosnaichean ann an 1999 mar chomharradh air dealas na Seirbheis airson taic do leasachadh pearsanta luchd-obrach agus do leasachadh buidhne.

Siostaman Fiosrachaidh

Tha na siostaman fiosrachaidh stiùiridh a' toirt cunntasan iomchaidh ann an deagh àm bhom faigh àrd luchd-stiùiridh, am Bòrd agus OFCOM air sùil a chumail air coileanadh obair na Seirbheis. Tha cinn-buidseit air an sgrùdadh an co-cheangal ris an ìre obrach, gnè chosgaisean agus dualan phrògram mar a chaidh aontachadh gu foirmeil le OFCOM. Tha a h-uile ceann-buidseit air a sgrùdadh gach mìos agus cunntasan air an ullachadh don luchd-stiùiridh agus don Chathraiche. Tha aithrisean agus cunntasan ràitheil air an ullachadh don t-Seirbheis agus do OFCOM.

Tabhartasan Riochdachaidh

Tha am Bòrd ag obrachadh siostam sgrùdaidh agus measaidh den h-uile tagradh phrògram a' toirt aire do shlatan-tomhais mar a tha air am mìneachadh ann am Plana Corporra bliadhnail na Seirbheis. Tha modh co-dhùnaidh a' Bhùird agus an luchd-stiùiridh air a bhuileachadh air taobh a-staigh ìrean maoineachaidh òrdaichte. An uair sin tha sùil air a chumail air mar a tha tabhartasan riochdachaidh bhon t-Seirbheis air an cleachdadh air an taobh a-muigh tro mhion-sgrùdadh den h-uile pròiseact corporra a chaidh a ghabhail os làimh agus air sampall den h-uile pròiseact eile, leis an obair iomchaidh ga dhèanamh a rèir toraidhean an sgrùdaidh.

Sgrùdadh

Tha an Cathraiche a' coinneachadh gu cunbhalach ris an Stiùiriche a tha an sàs bho là gu là anns gach roinn de obair na Seirbheis agus mar sin a tha ann an suidheachadh airson nam modhan smachd a sgrùdadh aig ìre obrach agus ionmhais.

A bharrachd air an in-sgrùdadh smachd bithear a' beachdachadh leis a' Bhòrd mu laigsean sam bith a chaidh an comharrachadh ann an sgrùdadh bliadhnail na Seirbheis bhon taobh a-muigh. Tha co-dhùnaidhean cudromach no cunnartan comharraichte air an rannsachadh gus an tèid dèiligeadh riutha gu h-iomchaidh.